A une cope d’or, a covercle d’argent :
Dont manja la duchesse, mais petit [ele] en prent,
Landris ne pot mangier, tant ot fier mautalent,
Si eüst mort Tomile et fait son jugement.
Les napes firent traire chevalier et serjant.
Landris et la duchesse avalerent le pont.
Ambedui s’entretienent as mains et a ba[s]ton,
Doucement s’entrebaisent le vis et le menton...
Son sene[s]chal apelle : « Amainne mon prison. »
Et il [le] amenerent sous le pin a[l] perron,
La hart lïée au col come .j. autre laron ;
Quant le voit la duchesse, si l’a mis a raison :
« Si m’aïst Diex, [Tomiles], vous semblez bien felon :
« Vous me mellastes primes al riche [duc] Doon,
« Et davant l’emperere qui Pepin a a non
« Moi chaçastes du reigne pour vo fil[l]e Audegour.
« Assez sait Damediex se je ai droit ou non ;
« Selon vostre servise atendez guerredon.
— Dame, » ce di[s]t Landris, « baissiez vostre raison,
« Si parlera[i] Tomile et pour moi et pour vos.
— Vassaus », ce dist li enfes, « di ta confession ;
« Or aproche li termes qu’or endroit te pendron.
— Sire », ce dist Tomiles, « pourquoi le celeron ?
« Quant je voi mon juïse, je n’i avra[i] pardon.
« Selonc [la] dame Olive coucha[i] je .j. garçon,
« De loier lui dona[i] mon hermin peliçon,
« Dont il perdit la teste et la dame s’anor.
- ↑ — 3996 au m. — 3997 menton, ms. maton. Après ce vers, lacune : il doit manquer un vers où était question d’Olive. — 4001 mis, ms. mise. — 4002 aist, ms. eïst. — 4003 Me melletes p. — 4005 M. chaceste. — 4006 A. cest Dieu se je ais ou d. ou n. — 4007 a. guerendon.
— 3990 a cole d’a. — 3993 Sil e.
