Et les vieutres detraire, (et) les ors encainer,
Et les pisons noians et le ciel estelé,
Et toute riens en tere comme l’arce Noé
Ai ge fait en ma canbre a fin or pointurer.
S’i a une richece dont vous ne vous gardés,
.Iiiic., chevaliers as manteus engoulés,
Et sont home ton pere, ne le quier plus cheler,
Julien de Saint Gille, qui tant fait a loer ;
Bien quide l’amiraus que soient mort geté ;
Mais je fac les François en ma cambre garder,
Les h[a]ubers et les elmes, les escus fors et lés,
Et cascun tient s’amie par l’ermin engoulé,
Qui est fille de conte, de duc u d’ami[r]el,
Et si que la plus [vieille] n’a pas .xxx. ans passé :
Quant il vieut, si le baisse douchement et soef,
Qui vous aideront bien, se mestier en avés.
— Dame, » che dist Elies, « .vc. merchis et grés.
— Aval par devers destre, quant vous i enterés,
Troverés le chiterne a fin or pointuré,
Et le mien lit demaine mout bien connisterés.
— Ne sai, » che dist Elies, « boin consel me donés. »
Et respont la puchele : « Encor(e) vous dirai el.
Trespassés tous les autres, devant vos ieus gardés :
Par art de ningromance sont li limon fondé ;
Aussi siet avenant con s’il fust compassé.
S’i a .i. vermeil paille galasien ovré :
Del plus fin or d’Arabe i a .c. mars saudés,
Si [i] a .m. clokete[s] qui pendent d’or fin cler ;
Touchiés i de vo doit .i. petitet assés :
Amis, en tant de terme con .i. hons peut aler,
Mais qu’il soit auques lons .xxx. piés mesurés,
Vous sonera li lis menuement soef ;
Ne harpe ne viele ne ro(u)te ne jougler
Ne nus oiseus qui soit, tant sache de chanter,
Plus volontiers n’orois, je vous di par verté. »
Elye entre en la cambre, .iii. tans i a trové