Or irai en ma terre, se Dieu l’a destiné. »
Quant Elies l’entent, s’a grant joie mené.
A la vois qu’il ot clere commencha a crier :
« Godefroi, » dist Elies, « fai ta gent escouter :
Tu iras a Saint Gille a mon pere parler.
De par Dieu et de moi mout bien le salués,
Et me secore chi, si fera mout que ber.
Cha sus en ceste tor m’ont paien enseré ;
Il sont bien .xxxm. fervestu et armé. »
Quant Godefrois l’entent, s’a de pitiet ploré,
Les maroniers apele belement et soef :
« Signor, » dist Godefrois, « .i. petit m’entendés :
Se vous a seche terre me poés amener,
Tant vous donrai avoir con vous penre en volés,
Et riche[s] coupes d’or et boins bacins dorés :
Ne serés ja mais povres se le savés garder. »
Quant cil l’ont entendu, se li ont creanté :
Lor cinglent et governent au ciel esperitel ;
Tant ont lor rices barges coru et ceminé,
Qu’il vinrent a Brandis, au port sont arivé,
Et montent es chevals qui furent sejorné.
Lors trespassent les teres et les anples renés
Et vienent a Saint Gille tout le chemin feré.
Par mi le mestre porte sont en la vile entré,
Et vienent el palais qui fu a or listé.
La trevent Julien qui dessent des degrés,
Aimeri de Nerbone et sen riche barné,
Et Hernaut le vaillant et Bernart l’aduré,
Et Garin d’Anseune et le franc Aimer,
Bevon de Commarchis et Bertran le sené,
L’archevesque de Rains, et le grant richeté,
Qui tienent parlement de la crestienté :
Elye voillent querre, nel sevent u trover.
Estes vous Godefroi qui les a salués.
— 2487 braidis