Ains si [tres]grans barnage ne fu mès asamblés,
Qui por le boin Elie vauront le mer passer.
Godefroi les conduist, u pais ot esté,
Il sot mout bien les marces, et le latin parler.
Lors vienent a Brandis, les os font sejorner,
Des dromons et des barges i vienent a plenté :
La dedens se sont mis nostre franc bacheler,
Et singlent et governent et pensent de l’esrer ;
Et voient de Sorbrie les murs et les pilers,
Les brestekes, les tors et les palais listés.
Godefrois li sachans a grant joie mené ;
Julien en apele, qu’a Saint Gille fu nés :
« Sire, » dist Godefrois, « mout t’est bien encontré :
Vois tu or cele tor a cel plonc crestelé ?
Laiens laissai ton fil a mout grant poverté,
Galopin l’Ardenois, et la dame al vis cler. »
Quant Juliens l’entent, s’a de pitié ploré ;
Il sont venu al port, des vaseus sont torné,
Puis montent es destriers dont i ot a plenté.
Si drechent les ense[n]ges, si pensent de l’esrer.
Quant Galopins les voit, c’as murs fu acostés,
La u il voit Elie, si l’en a apelé :
« Hai ! sire compains, bien nous est encontré(s) :
Veés ichi les ensenges de la crestienté,
L’oriflambe le roi de Paris la chité,
Aymeri de Nerbone, le viel quenu barbé,
Julien de Saint Gille au dragon enpené.
Amis, fai une cosse que te voil deviser,
Que vous vestés l’auberc et l’iaume fremés,
Et si çaingiés l’espee au senestre costé :
Montés en Marchegai, le destrier abrivé,
Et g’irai la defors a Loeys parler. »
Rosamonde la bele va congiet demander,
Et ele li dona volentiers et de gré.
Par le fausse posterne issi de la chité,
Il lait ester le pas, si se prent au troter,
