Le milleur chevalier qui rengna en l’anee.
Mais il avoit un frere (sa vie soit dampnee !),
Millez fu appielléz, c’est veritéz prouvee ;
Pis valy que Caÿns de fait et de penssee,
Car son frere traÿ par male destinee.
Huy mais vous en sera vraie canchon cantee,
Qui doit y estre des boins oÿe et escouttee :
Ch’est d’armes et d’amours, d’assault et de meslee
Et de mainte adventure et de pitté moustree.
Quant a Ronme nasqui la bielle flour paree,
Maint signe y a paru a ycelle journee,
Car on vit sans plouvoir et queÿr le nuee
Et le solleil cambgier, dont la gent esgharee
Fu fourment a ce jour : moult en fu effraee,
Pour cheste varianche fu grande le huee,
Car le mere en moru, quant en fu delivree,
Dont Ostes l’empererez ot moult le chiere yree.
Son consseil fist mander par toutte le comtree ;
Sus ou palais maiour fu grande l’assamblee :
La ot maint sinatour de haulte renonmee
Et maint clercq sciencheux de scienche fondee.
Adont li empererez parla sans demoree :
« Signeur », dist l’empererez, « j’ay mout le chiere yree
Que me fame moru, quant me fille fu nee,
Et des signez ossi qui firent la journee
Enssi tous esbahis ; par la Vierge loee,
Onques telle merveille ne fu mais regardee. »
Ostes li empererez de Ronme le maiour
Fu devant son consseil en doutte et en paour,
En demandant consseil a maint francq sinatour
Pour les singnes oribles qui avinrent au jour
- ↑ 73 emperez.
46 La — 47 fr. que sa — 49 Puis — 50 mal — 56 Le premier a manque — 62 li e. — 68 li e. — 70 fist a la — 71 Et e. — 72 telles merueilles
