Que par jour ne par nuit il ne pooit durer.
Mais folie le fait a si bielle pensser,
Car c’estoit le plus lais c’on puist regarder.
Chieus Sire le confonde qui tout a a sauver !
Puis fist pour la puchielle mainte ville ghaster,
Maint chevalier morir, maint saudoiier finer,
Ainssi que je diray, s’on me voelt escoutter.
Signeur, chieux rois Garssillez dont je fay mention
Estoit uns rois poissans qui avoit grant renon ;
Viellès estoit li rois, tous blans sont si grenon,
Li oeil li sont ou chief plus rougez que carbon.
Ung jour estoit li rois sur son destrier gascon,
S’estoit aléz voler et o luy si baron.
Li rois s’i rewarda, s’a veü un Griffon,
Moult riche marcheant, car d’avoir ot foison ;
Arivéz fu au port, o lui si compaignon.
Li rois tourna viers lui son destrier araghon
Et puis le salua clerement a hault ton,
Et, quant cheux l’a veü, soy mist a genouillon,
Et li rois li escrie : « Dont vient li compaignon ? »
Et dist li marcheans : « N’en feray chelison :
Je viench de Ronmenie, dou paÿs environ.
— Amis », che dist li rois qui Gharssille ot a non,
« As tu esté a Ronme, c’on dist em Pré Noiron ?
Dy moi se t’as veü le corps et le fachon
De Flourenche, la fille a l’empereur Otton. »
Et dist li marcheans : « J’ay veü son menton.
L’autre jour y ot fieste et noble establison ;
Bien cincq cens chevaliers a doré esporon
Y ot a ce tournoy dont je fay mention ;
Comtez, dus et princhiers y avoit a bandon.
- ↑ 217 aler v. — 219 marchant ; frison — 226 et dou — 227 li manque ; gharssillez — 231 marchans — 233 dorez — 235 habandon.
