Car sachiés vraiement : vous le verréz passer
Et le vostre royalme essillier et ghaster ;
Assegier venra Ronme, quoy qu’il doie couster,
Ne ja mais a nul jour ne l’en verréz raler,
Tant qu’il vous ara fait a son gré acorder.
Ou vous voeilliés ou non, je vous di sans fausser,
Il avera vo fille a mouillier et a per. »
Et dist li empererez : « Dieus l’en voeille garder
Et se me doinst pooir de matiere sauver !
Je vous ay en couvent, quoy qu’il doie tourner,
Que, s’il vient par decha pour mon paÿs ghaster,
Se ma ville assegier ne ses tentes lever,
Qu’encontre lui yray pour battaille livrer. »
Quant li boins empererez oÿ c’on le defie,
As messagiers a dit : « Biaus signeur, je vous prie :
Or me diréz au roy qui les Grigois maistrie
Que, s’il vient par decha baniere desploiie,
G’isteray contre lui, se Dieus me beneïe,
Et se li mousteray ma forche et mon aiie.
— Je vous ay bien oÿ, sire », dist Acarie ;
« A Jhesus vous conmand, qui tout a en baillie. »
Lors se sont desevret trestout par compaignie,
A lostel sont venu, que nuls ne s’i detrie ;
Il montent es chevaus, s’ont leur voie acueillie.
Ne sçay que le canchon vous en fust eslongie :
Jusqu’en Coustantinoble ne s’arriesterent mie.
La trouverent Gharsile a le barbe flourie,
Et, quant illes pierchupt, hauitement leur escrie :
« Signeur », ce dist li rois, « or ne me cheléz mie :
Ou est chelle puchielle qui tant est ensengnie ? »
Et chil ont respondu : « Vous parléz de folie,
- ↑ 593 maistroie — 594 decha mer baniere.
579 royalment — 580 doy — 583 ou nom — 587 Et je
