Si sonmes chi venus avoecques no mainsnie
Pour nous aventurer et pour vous faire aÿe,
Et se nous vous faisons aucune courtoisie,
Vous yestes si vaillans vous nel retenréz mie. »
Et quant li empererez a le parolle oÿe,
I a dit a Millon : « Jhesus vous beneÿe !
Par le foy que je doy a le Vierge Marie,
Liés suy que je vous voy en yceste partie,
A ma court vous retieng et vous conmand et prie
Que tout che qu’il vous fault prendéz en vo baillie
S’on le vous escondist, je vous aciertefie
Chier séra comparé, s’il est qui le me die. »
Et quant Milles l’oÿ, douchement l’en mierchie ;
Ossi fait Esmeréz, qui moult biel s’umelie.
Uns escuiiers d’iloecques a fait le departie,
Deschi jusques le cambre Flourenche le jolie
Ne s’i est arriestéz et puis se li escrie :
« Dame », dist l’escuiiers, « par le cors saint Elie,
Verité vous diray, se Dieus me beneÿe !
Ou palais sont venu li doy hoir de Hongrie,
Che sont doy damoiziel de haulte signourie ;
Oncques ne vy plus biaus en nesunne partie
Et dous et grascieus de maniere adrechie.
Il sont ou hault palais, ou li rois les festie. »
Quant Flourenche entendi de chelui le raison,
Tantos en appiella se maistresse Audeghon :
« Dame, or aléz veoir quel sont li dansselon ! »
Et celle respondi : « A vo devision ! »
Adont s’en departi sans nulle arriestizon ;
Elle vint ou palais ou furent li baron
Et vit ou fausdestuel l’empereour Oston,
- ↑ 783 lentendi — 786 celle li.
759 auoecq — 760 auenturez — 768 que il — 770 quil mest die — 776 li e ; crois s. — 782 li f.
