Lors dist a se maistresse : « Par le mien Sauveour,
J’ay au jour d’uy pierdu le boin roy, mon signour, »
Adont queÿ panmee par daléz unne tour.
Flourenche se pasma, qui de coer fu marie ;
Li baron sont venut a lui par courtoisie
Et si l’ont relevee moult tristre et courouchie.
« Dame », font li baron, « che ne vault unne aillie :
On ne poet pour plourer rendre un honme la vie.
Mors est li empereres, par qui joie est falie ;
Chiertes che poise nous, moult avoit signourie
Et moult estoit preudons. Son ame soit saintie !
Ch’a fait li rois Gharssilles a la barbe flourie ;
Or a il tant fourfait qu’il ne vous ara mie,
Et, s’il plaist a Jhesus, le fil sainte Marie,
Nous arons contre lui victore unne aultre fie.
Laissiés ester le doeïl, douche dame prisie,
Et si reconfortez nostre chevalerie,
Car vous yestes no dame et maistresse et amie,
Et si vous ayderons a l’espee fourbie,
Tant que li mors dou roy sera si bien vengie
C’on en sara parler tant con li chieus tournie. »
Quant ia dame les ot, douchement les mierchie :
En sa chambre s’en va dolante et esbahie.
Millez et Esmeréz, ou moult a signourie,
Se firent desarmer de leur chevalerie,
Puis revinrent a court avoecq le baronnie.
Le corps l’empereour, dont je vous segnefie,
Firent enbaussimier moult bien a celle fie
Et mettre en un sarcus de moult grant signourie.
O grant moustier saint Piere fu veilliés le nutie,
- ↑ 1163 F manque — 1164 olui — 1172 qui ne — 1173 se il — 1177 vo d. ; le premier et manque — 1180 conme li — 1181 les os — 1183 a de s. — 1186 Li.
1161 Jeay