Conment il puist deffaire son frere le menour ;
Il jure Jhesucris, le Pere creatour,
Ja mais joie n’ara, s’ara le haulte honnour
De la bielle Flourenche et dou paÿs autour
Siervy et honnouré dedens Ronme le grant,
Et Garssillez li rois ot moult le coer joyant
De le mort l’empereur, Oston le souffissant.
Li rois estoit logiés tout a son couvenant,
N’estoit pas lons de Ronme, che disent li auquant :
N’y avoit c’une lieuwe, si c’on troeve lisant ;
Li fourier vont autour le paÿs essillant.
Li rois va son consseil vistement appiellant :
« Signeur », che dist li rois, « or oiiés mon samblant !
Par dedens Ronme sont li Ronmain moult dolant ;
Mais, s’estoie creüx, je vous jure et creant
La chité assauroie et derriere et devant,
Car il sont esbahy et fourment recreant.
Espoir, se il nous voient d’assalir apparant,
Qu’a moy se renderont, pour che qu’il sont doubtant. »
Et chil ont respondu : « Vous aléz bien parlant ! »
Unne espie l’oÿ, qui s’en va departant ;
A Ronme est acourus, si va dedens entrant,
Deschi jusc’au palais ne se va arriestant.
La trouva Esmeret et Millon le poissant,
Sansson et Agrevain, Richier et Clariant
Et maint fier sinatour, qui moult furent vaillant.
Ly espie les va haultement saluant,
Et, quant il l’ont veü, bien le vont ravisant,
De Gharssilles li vont nouvielles demandant
- ↑ 1528 lempereour — 1529 Leur il e — 1530 disent manque — 1531 si conme — 1544 jusques au.