« Pués nos en aleromes d’autre part en cil aire.
« Se vos a gient a gient encontrez l’aversaire,
« Encué i romenront mant fiuz de bone maire. »
Lors respondi Hestous : « Par foi, sire enperaire,
« Bien vos doit cist consoil anoier et desplaire ;
« Se mielz ne vos sai dire, si me fetes detraire. »
« Sire », ce dist Hestous, « Je vos sai bien aprendre :
« Fetes les doçes piers sor Feragu descendre,
« A uns a uns pasier et ferir et ofendre ;
« Je le sant bien si feit, nos desdira, d’atendre.
« Avant qe il les puesse tut retenir et prendre,
« Poroit avenir grace qe cil moroit dou mendre.
« Se vos a gient a gient les iroiz acontendre,
« Hoi veroiz de vos homes maint morir destendre.
« Mais ancué est le jors qe vos devoiz chier vendre
« Les graces as couars qe siroient da pendre.
« Cels qe soloient tant e vanter e espendre,
« Ai veüz lor colors paleïr plus qe cendre ;
« E por Ogier le di, qe bien me puet entendre,
« Qe vint fuant vers France, tant com ceval puet tendre,
« Por dir qe Feragu venoit Navaire prendre.
« La mercé le Denois, ne degna tant atendre
« Q’il leisast son escuz ni pecoier ni fendre, »
Estous a regardez, ja s’i voloit mesler,