A vois escrie : « Monjoi l’emperaor !
« Biaus sire Diex, or so je bien de vor
« Che porterai de cist Paiens l’onor ;
« Nulle duree n’avra vers mon valor. »
Mout fu joianz Hestous, le fil Odon ;
L’espee treite, torne vers l’Aragon.
Le niés Marsille, irez come lion,
Dreça le fust qe ne feit a garçon.
Hestous li voit, si dist : « Por saint Symon,
« De la venir non serai si bricon.
« Qeil voir diable durroit a cil plancon ?
« Ainz atendroie le brancer d’un heiron :
« Se n’i demor, proece el me perdon. »
Anz qe venist le filz roi Falsiron,
Li mostre Hestous dou destrer le cropon ;
Arier repeire un pué plus chel troton.
Davant lui garde, voit venir de randon
Le duc Rollant armé sor Saudemon.
En tote l’ost ne a cheval si bon,
Fors Veilanti, qe li dona Carlon :
Cist bon destrer a Rome, au Pré Noiron,
Un apostoille lui an oit feit li don.
Rollant retient le frain par le boton
Par rampoigner cusins e compaignon.
« Cusin Hestous », ce dist le duc Rollant,
« Grace et merci en ait l’Onipotant