E dos Flamains versa contre terre estendu ;
Le nos voit daumajand e desprise Jesu.
L’arcivesqeve de Reins s’en est aperceü ;
Se ne li puet chier vendre, ne se prise un festu.
Dolant fu l’arcivesqueve, quand vit l’oltrecuidançe ;
El escrie au Païens : « Diex te don mescheançe !
« Mort ais mon compaignon, si maudis lor creançe.
« Or atend un petit, q’a moi cheit la venjançe. »
Lor broce li destrer, li Saracins avançe
E fiert si Senestors en l’ieume de Clarançe
Que jusque en la cervele li desevre e detrançe :
Unques ne l’investi de plus grief penitançe.
Cil versa mort a tere. Q’en est soe boubançe ?
Li ceval por la rene prend Ervi de Costançe.
La oit une bataile fiere e de gran pesançe.
De Senestors vengier font Paiens lor poisançe.
Quatre cent furent bien, qe les barons de France
A le fraper les ont mis en la desevrance.
Neporquant le partir as barons atalançe :
Nel font por coardise, mais por obediançe.
Vers l’ost Rollant s’en vont o il est lor fiançe.
Paiens les encalcent, dond il font grand enfançe ;
Se trop mener se leissent, tard ert la repentançe.
Çoiant sunt Espanois de cele departie ;
Fieremant les encaucent, ceschuns li brait e crie ;
