Molt est joiant Hestous, quant il entent
Che por cestui avroit delivrement.
L’en li aporte son rice guarniment ;
Le fil le roi l’arme meesmement.
Quant il se voit armé entierement,
En son cors jure le Roi onipotent
Mal le donroit Paien engombrement.
Malgeris garde, poi li dit fierement :
« Amiral sire, je te fais sagrement
« De vive guere a tretot mon vivent.
« Aubergiés m’ais une nuit solement :
« Se Deus de gloire e mon brant le consent,
« Je paierai mon hoste entierement
« De tiel mainere cum firent mi parent. »
Respont li roi : « Alez vos mantenent,
« Che ces paroles avrunt mester breument. »
Le duch devalle dou mastre mandament ;
Menez i fu son ceval de present ;
Il saute sus par sun estreus d’arjent,
Pois s’aficha desor si roidement
Plus d’une paume le dur choir se destent.
Ysoreç jure Maomet coiement :
« Je ni taing mie Rolant ni fol ni lent
« Quant per toi fist de moi le chanjament. »
Ysoreç voit sor sun cival monter,
Pois comanda amener li destrer
Che li donoit roy Marsile l’Ascler
