Trepins en apella de Rens en Normandie,
Hestous et Anseïs le proz de Picardie ;
La gient qe vient lor mostre, qe il n’amoient mie :
Ce sunt les païsans qe por doner haÿe
Vienent a la citez qe ja stoit convertie.
« Seignor », ce dist Oger, « se me fetes complie
« De .vc. chevalers en ma conestablie
« E venez avec moi en nom de compagnie,
« Ceste gient qe sorvient font male cevaucie.
— Dehait », ce dist Hestous, « qi ce vos contralie !
« Tot primer i ferrai de ma spiee forbie. »
Atant se partirent la franche baronie
E sont mil chevalers qe lor foi ont plevie
De nun falir l’uns l’autre deci q’en la finie :
Grant amor se porterent et fine compeignie,
Ne porterent jameis l’uns l’autre nule envie
D’onor ne de richece ni d’autre menantie
Fors de seignor servir et feir chevalerie.
Hestous et Anseïs e le Denois Ogier
Partirent de l’estor a bien mil chevaler ;
Les païsans alerent firir et encontrer.
Primer les leiserent en la plaigne avaler ;
D’anbe part s’entrevienent a lor lances baser.
Mellias veit ferir Gilles de Sant Homer :
Dou colp q’il li dona l’a feit mort averser.
Anseïs esperone por le vasal vengier :
D’une mace pesant ala ferir l’Escler
A dos mains sor le heume ; li eulz a feit voler,
Dou cheval l’abat mort, si s’en fuit le destrer.
- ↑ — 10824 fuir — 10829 esperona — 10831 sor leume.
— 10804 rens enõ mdie — 10811 en mon de c. — 10813 Dehainz — 10814 i ferai — 10816 plenie — 10818 porteront — 10819 lantre
