Mon nom vos non dirai, mai sui Patavian,
De la citez qe fist Antenor le Troian,
En la joiose Marche del cortois Trivixan,
Pres la mer a .x. lieues, o il est plus proçan.
En croniqe letree, qe escrist da sa man
L’arcivesque Trepins, atrovai en Millan
L’estorie e la conquise dou regne Castellan
Qe fist le neveu Carles por coroner Audan,
La seror Oliver, q’el plevi soz Vian.
Encore vos dirai, se tant vorois sofrir,
Com il fist le Soldant et son fil convertir,
Quant il trova Ugons, qel stoit alez querir.
Oiroiz com a soi quart se mist a departir,
Quant il trova l’armite, qe lui dist tot a tir
Quant il devoit durer et quant devoit morir.
Mais sor tot autres coses vos pora abellir
La joie q’en fist Carles quant le voit revenir.
Se por loer devroie totes ses huevres dir,
Il vos anoieroit, je le sai sans fallir ;
Neporquant il devroit a tote gient ploisir.
Car la bontié Rollant ne feit bien a tesir.
Pués qe de ses bontez sui mis a descovrir,
Dou tot les canterai ; ne m’an pois retenir.
Biaus fu le jor et le solel luisant ;
Ariere torne le large cont Rollant
Et Olivier et Ogier le vallant,
Gerarz li duc, qe gariz fu alquant.
Bien ont de lor pensee acompliz le talant,