« Or sui ci cum ermite qe fa la treduaine.
« Fortune de ces siegles ai bien la plus sotaine ;
« Ja me cuidoie seoir bien prés la soveraine.
« Mais poi qe vostre roe me vuelt estre vilaine,
« Verés moi trepaser outre la mer autaine.
« Je sai bien le langaje de Perse e l’Aufricaine,
« La Greçoise, la Hermine, e sai la Suriaine :
« Se chevaler deu segle doit vivre en terre straine,
« Ne dot q’a mon cival poise falir l’avaine. »
Sa man a sa maxele, sor son eschu chougé.
En avision i vient q’el estoit en son tré,
Olivier son chier dru a son destre costé
E plus de .c. entor, des meilor e privé,
Si rampognoit Hestos, cum il estoit usé,
Dond mout s’en risoient environ le berné.
E quand aparut l’aube, cheü sunt li rosé,
Por desot son aubers s’est le duc refroidé :
Le douç ensoigne part, qe veiland l’a laisé.
Ensi come rubaud, quand tot a baraté,
Quand la nuit soigne vencre, dond est joians e lé,
Pois, quand il se reveile, est doulant et iré :
Tot si remis le duc quand il fu reveilé.
Li duc pensis en estant se leva,
A son cheval vient, qe il cougié trova :