Si com Rolant veult son hiaume lacher,
Environs lui oit maint buens chevaler.
La file ou roi le veit ou poing cobrer,
Cortoisemant le pris a areisner :
« Jantis hom frere, ne vos doit anoier ;
« Vos avez prise, por ma vie eslonjer,
« Une bataile qe mont feit a douter
« Vers le miaudre home qi soit deqa la mer ;
« A peril estes de mort, je de brusler.
« Por le meilor vos voudroie proier
« Qe me sofrés vostre cors a armer.
— Ma damoisele », feit Rolant, « volenter ;
« Mais armes ai que rien ne veul cangier :
« A um Frans les touli qe mont les avoit chier.
« Escu e lançe vos demand e destrer :
« Foible est le mien, si le m’estuet laiser,
« Por la marine qe le m’a feit troubler. »
Dist Dionés : « Ne v’an convient douter. »
L’ardi Soldan dist a son escuher :
« Va moi », feit il, « le blanch cheval mener
« Qe m’envoia roi Salindre l’autr’ er. »
E cil s’en veit le cheval atorner.
Le dus remis por son cors adober.
Rolant s’atorne, qi proueche salue.
La riche broine avoit el dos vestue,
Ne doute armes une branche foilue ;