Cant ensi ot le duc fornie sa besoigne,
De retorner a Mec et a sun segnors soigne :
Les desert costoient et les vaus de Sandoigne,
Et paserent Guion as guez de le Choudoigne ;
Lez la mer de Latan atroverent Sidoigne
O une gent abite que ja n’ont autre soigne
Que de mangier et boir de ce que Dés lor doigne,
Et funt si grant honor, s’il avint q’il i joigne
Uns estrange a moison, cun le livre tesmogne,
Sa feme li otroie, non le tint a vergoigne ;
Et se il le refuse, sue teste li rehoigne,
Disent qu’il est cruaus ni a d’amisté soigne.
Le duc oi le chustume qu’en cel païs estoit
Et la vie des homes : sacés molt i desploit ;
Por ce non velt entrer ni aler in lor destroit,
Ainz fist sun tref destendre o le plus grant prés voit.
Cels de Sidoigne invoie ; il en vint grant esploit,
Ceschuns de flors de rouses plaine mains i portoit,
Estrimens avoient qe molt doulz tentisoit.
Sonant et charolant vinent au duc tot droit,
Pué li funt demander s’autre riens i plesoit,
Fors icel sacrefise que cescuns i fesoit ;
Ja ne lor voudra quere riens que ne li outroit,
Afors que porter armes, qe ja nuls ne l’avoit,
Ne ja un tot soulet dou païs non istroit.
Rolant oï qu’entr’ aus point d’armes n’i avoit ;
