« Jamais non mescrerai nul antis vasalaje.
— Amis », ce dit Sanson, « en le celestre estaje
« Est le qeison por qoi fais a Pagien domaje :
« La tempre de m’espee a trop grant avantage. »
A ce qe il parole en leur Roman lengaje,
La clocete oïrent soner au Deu mesaje.
L’armite sali sus, qant il oï le son,
E a dit : « Or atend, biaus frer, qe ja avron
« Une dimi pan d’orge et un pome rodon.
« Avant qe tu t’an ailes de la moie maison,
« De ce qe l’en m’aporte dou celestre roion
« Maingerons loialment come bon compagnon.
— Sire », ce dit le duch, « je vos requier un don
« E, se je i faloie, si demand li perdon.
« Bien croi qe vos n’alés parler a terans hon,
« Mais a un citoien dou regne d’Aquilon :
« Demandés li, biaus sir, ne di se por bien non,
« Quant ert corte ma vie a cist pechable mon. »
Li hermite li regarde, puis li dist un sermon :
« Nen ais tu mie point lit les vers de cançon ? »
Li duch bati sa coupe dos fois soz le menton,
E le hermite s’en veit e leisa lo baron.
Rolant en mi l’anclostre s’est mis en genoillon ;
Le vis vers Oriant, comance un’ oracion.
Pues dist : « Ai ! saint splendor qi le monde inlumine,