L’angle qi tel lugor e tel splendor gitoit
Mis sor le sant autel un pain q’inter estoit
E dous pomes ausi ; pués parle e dit : « Ce soit
« Por le tien compagnons qi est chevalers droit ;
« Bien a feit e fera, tant con vie li croit ;
« Por eshalcer la loi onqes son per non oit.
« Fa li onor, car c’est le ome beneoit
« Qi pechié de luxurie ni nul mal non feroit.
« Il dit qe de sa vie molt volunter saroit,
« E il en avra grace, car bien avoir la doit :
« Quant prixe ert la citei qi France or redoit,
« Set ans vivra, non plus, en le humain destroit ;
« Mout joians pora estre s’onques France revoit ;
« Traïs ert en Espagne, ou coroner se croit,
« E teil le traïra qi il mout ame e croit.
« Grant joie lui doit estre, qant cil pont avindra,
« Qu’en le servise Deu come martre mora :
« En male hore nasqui cil qi le traïra.
« Conforte lui de ce qe il deman vera
« Son oncle e si compaign ; mais un perdus en a.
« Ne la vie de toi gaire non durera :
« Jamais l’autre solel tes oil non revera,
« Que morras au matin, qe jor n’esclarira.
« Cil qu’est ore arivé con prevoire sera
« En oïr tes pechiés, e pués t’enfoïra. »
