De le sabor dou pome Sanson merveile prist.
Rolant li regarda andos, e si lor dist :
« S’il vos fist ier soir grace nostre magne Menist
« E je voi q’ancor nul de vos l’en benoïst,
« Por qoi vos serviroit, s’il por qoi non veïst ?
« Loés l’en, s’il vos a feit ce q’ancor ne fist
« Vos aiol ni vos peres ne qi de lor insist.
« Or chevauchons avant en le nom dou Batist. »
E il ensi firent, pués q’il lui abelist.
Tot droit contre levant Rolant son chemin prist
E voit un grant boschaje por delez un robist :
Chemin, senter ni voie n’i trova ni l’aprist,
Mais tant oit grant fiançe en le mand Jesu Crist
Qu’il ne garda por riens qe l’en adevenist
Que, quant se fu signé, ou bos ne se ferist.
Si tost con le cheval dou guaut fiert la frontere,
Si i ovri une voie mout large e mout pleneire ;
A bien terz doi e plus i a aute la poudriere ;
De .cc. ans passés senbloit ancionere.
Si con il vont avant la veoient entiere,
E, qant il arestoient por aucune maniere,
Ne verent fors que bois devant els ni darere,
Les grant arbres entor els e le grant foillere.
Rolant retent le bai por la rene d’or chiere.
« Hues », dist il, « or dites, et vos, Sanson, biau frere
