« Droiz emperere, .v.c. merciz de Dé ;
« Por nos vos estes traveilliez et penez. »
Auquaires a Aymeri apelé :
« Sire parrainz, un petit m’entendez :
« Prise est Nerbone, la merci Damedé ;
« A mon pooir m’en sui je molt pené ;
« Lo guerredon vos en vueil demander ;
« Feme prendrai se vos la me donez. »
Aymeris l’ot, si respont come ber :
« Sire fillex, un petit vos cessez :
« Mollier avrez, quant vos la demandez ;
« En doce France la convient a garder,
« Bele et cortoise et de haut parenté
« Ou vos soiez richement mariez,
« Et si prendrez et chastiax et citez.
— Sire, » fet il, « tot ce lessiez ester.
« N’ai soig de France, ne ja n’i quier entrer ;
« Devers Espaigne me lessiez converser :
« Que molt me héent Sarrazin et Escler
« Por ce que sui a vostre loi tornez ;
« Ne lor falt gerre en trestot mon aé.
« De vostre terre un petit esgardez
« Ou je poïsse un sol recet trover.
« La cité gaste, se vos plest, me donez
« Que hier veïsmes el sauvaje regné ;
« Esclabarie ainsi l’oï nomer.
— 3006 B Sire emp., A C Emperere, D et grez. — 3007 A nos i estes, C Por nos estes. — 3009 C escotez. — 3010 A B Crestiens sui. — 3011 A B vos ai servi a gré. — 3014 C si commence a parler. — 3015 C D m’entendez. — 3016 C la requerez. — 3017 C esgarder, D la convendra g. — 3018 C D de grant p. — 3019 omis dans A B, D serez. — 3020 A B Ou vos pregniés, C Et si avrez et c., C D ajoutent : Bors et viles et riches fermetez. — 3021 A B dist il, C ice l. — 3022 C aler. — 3023 C En Esp., D convient converser. — 3024 C Molt me h., D Forment me h. — 3025 A B a vo loi atornez. — 3026 C D lor aé. — 3028 C fermer. — 3030 C soz la roche de mer, D lez la roche de mer. — 3031 C issi.
