Li Sajetaires a Joifroi coneü
Qui en sa chartre ot longuement jeü.
Quant il lo voit grant duel en a eü ;
D’une grant hache a entor lui feru,
Qui il ataint, morz est et confonduz.
Voit lo Joifroiz, cele part est venuz
Par grant aïr, entoisé lo branc nu :
Par mi son elme a lo gloton feru,
Deci es denz l’a trestot porfendu,
Estort son cop si l’a mort abatu.
François lo voient, grant joie en ont eü,
Et li gloton en furent irascu
Quant lor seignor virent mort et vaincu ;
Tel poor ont li cuvert mescreü,
En fuie tornent, n’i ont plus atendu :
Franc les enchaucent, si ont levé lo hu,
Après destendent li jone et li chanu,
Cil qui ainz pot a force et a vertu :
Qui il ataignent, mort l’ont et confondu ;
N’en eschapa que .x. des mescreüz,
Que puis qu’il orent lo mestre d’ax perdu,
Furent il pris com oisiax a la glu.
Tant ont l’enchaut li baron maintenu
Que tuit sont mort li cuvert mescreü.
- ↑ CXXVI. — 3832 D Que... tenu, C la ch. — 3833 C Com... vit. — 3834 A B De sa grant h. a itant cop f. — 3835 C D Morz est a fin qui il a conseü. — 3836 C coru. — 3838 A B le hiaume. — 3841 omis dans A B. — 3842 D furent molt. — 3843 A B ainsi vaincu. — 3844 A B felon m. — 3845 C qui n’i ont atendu. — 3846 A B a force et a vertu. — 3847 A B Apres ax vont. — 3848 C Cil qui ainz ainz. — 3849-9 omis dans B. — 3849 C consivent, A est. — 3850 A ne jones ne chenuz. — 3851 A B virent... vaincu. — 3852 A l’oisel, C li oisiax a glu. — 3854 D malostru.
