Page:Anonyme - Macaire, chanson de geste.djvu/229

404—430

37

Macai re.

Li emperere si fist que sages hon :
Il en apele et Richier et Naimon,
Et asés d’autres qui sont de grant renon.
S’i fu Macaires, cui li cors Deu mal don !
Cil le destruie qui sofri passion,
Que il et cil qui de Maience sont
Tot jor el mont murent noise et tenson !(*)
Or sont ensemble au jugier li baron.
Li mals Macaires nen a dit se mal non
De la roïne qui clere ot la façon ;
Dist au roi : « Kalles, entendés ma raison.
« Qui qui vos aint, si vos tien à bricon
« Quant la joutice vos en menés si lonc, (*)
« Et se volés croire le duc Naimon,
« Honte en aurés et reprovier el mont, (*)
« En tel maniere que li petit garçon
« En chanteront de vos male chançon. »
Naimes l’entent, si tint le chief embronc ;
Tel duel en ot par poi d’ire ne font. (*)
Ja parlera, oiant le roi Kallon ;
« Gentis rois sire, entendés ma raison :
« Diex me confonde qui sofri passion
« Se je di chose qui ne soit se voir non.
« Conseil querés ; tel i contrediront
« Si come cil qu’ont male entencion
« Vers la roïne qui Blancheflor a non.
« Jugier la vuelent par grant aïrison,