Page:Anonyme - Macaire, chanson de geste.djvu/244

52

597—613

Macaire.

« Qe una fois qe eo estoia deporté
« En un çardin, çes me fo encontré.
« Li mal Macario si me fo acosté,
« De drueria m’avoit apelé
« Si como falso, malvasio renoié.
« Et eo da lui ben me fui defensé,
« E malament eo li resposi aré,
« E se mais m’aust ces rason conté,
« A mon segnor li averoie derasné.
« Or savés vos qe me fe cil malfé ?
« A moi avoit li nano envoié
« Con ste parole q’il m’avoit conté.
« Et eo quel nan avi ben pagé,
« Donde le çevo el n’oit ensanglenté
« Et in apreso quel traito renoié
« Con quel nan el se fo conselé ;
« Entro ma çanbre lo mis à la çelé.
« Quando li rois fo al matin alé,
« Et in mon leto fo cel nan colçé
« Si qe li rois li trovo quant fu reparié.
« Et eo me dormia, tuta fo spaventé
« Quant vi li rois e li altri çivalé.
« Adoncha fu e presa e ligé,
« E à li fois eo son como çuçé,
« A gran torto e à mortel peçé.
« E vos o dito tuta la verité ;
« Unde e vos, nobelme abé,