« Quant il sera bautisiés et levés,
« Et d’oile sainte benéis et sacrés,
« Et sera il Primerains apelés
« Par son droit nom, si com je l’ai esté. »
Quant de uit jors vint li termes passant,
Vient Primerains à la dame et demant
Qu’ele li doint et li baille l’enfant,
Que il l’en porte à son bapteiement.
Et le fait cele et bien et doucement.
Donc Primerains en sa brace le prent,
En son mantel le vait envolepant,
Vers le mostier si s’en vait tot errant.
O lui ne fu nus hom el mont vivant,
Fors Varocher, qui derier vait trotant.
En son col porte le grant baston pesant.
Ains que il voisent ens el mostier entrant,
De Honguerie es le roi chevauchant,
O chevaliers moult dou suen tenement.
Primerain voit, à demander li prent :
« Où alés vos, Primerains, si errant,
« Et qu’avés vos en vo mantel pendant ?
