Page:Anonyme - Macaire, chanson de geste.djvu/315

1443—1469

123

Macaire.

Et si fait il tantost l’abé mander.
« Abes, fait il, de tant vos voil proier,
« Se vos m’ames et me tenés point chier,
« Que cest enfant vos m’aliés bautisier
« D’emperéor com se fust iretiers(*)
« Et fils à roi de pere et mere nés,
« Et à l’office si hautement chanter (*)
« Com se poroit faire por nul mestier. »(*)
Et dist li abes : « Bien fait à otrier. »
Atant descent li rois jus del destrier,
Et avec lui trestuit li chevalier.
Ensemble tuit s’en entrent el mostier.
Prist l’enfant l’abes quant il le vout sacrer
Et d’oile sainte premier rengenerer ;(*)
Et quant ce vint après al bautisier
Ce dist li abes : « Com le volés nomer ? »
Et dist li rois : « Si com me fais claimer. »
Et respont l’abes : «  Bien fait à otrier.  »
L’enfant a fait Loéis apeler.
Puis le bautesme, qu’il s’en voloit aler,
Maintenant a li rois l’oste apelé.
« Oste, fait il, de tant vos voil proier
« Que aiés cure de la dame aaisier
« De trestot ce que li aura mestier. »
Si fist deniers à Varocher donner,
Qui de l’enfant se fait pere claimer,
A ce qu’il ait moult bien à despenser.