Page:Anonyme - Macaire, chanson de geste.djvu/317

1470—1496

125

Macaire.

Quant Varochers ot l’avoir à bailler,
Se il ot joie ne l’estuet demander ;
Joians s’en vait o le visaige cler.
Et revait l’ostes la roïne aparler.
« Dame, fait il, bien vos poés prisier
« Le vostre fil quant a fait bautisier
« Li rois d’Ongrie, qui tant est preus et ber,
« Et si a fait le bachelier nomer
« De son droit nom, n’en sot millor trover. (*)
« Loéys a à nom vos iretiers.
« Et à son pere, si se fait il claimer,
« Dona li rois deniers por despenser. »
La dame l’ot, moult li prist à gréer.
Or li font l’ostes, ses filles, sa moillier,
Plus grant honor ne fesoient premier,
Por ce qu’avoir ot miex à despenser.
Ensi remest quinze jors ajornés (*)
Quant Primerain a fait li rois mander.
Et cil i vint de gré et volentiers.
Et dist li rois : « Il vos estuet aler
« Vers cele dame, et li dire et conter
« Que ses comperes la vorroit aparler. »
Et dist li ostes : « Bien fait à otrier. »
Del roi se part, ne se vout atargier,
Vient à la dame la novele conter,
Quant li plaira se doie aparillier,
Que li frans rois, qui ses comperes ert