« Cun çeste hon straine tere çercher ? »
La raina l’olde, comença de plurer ;
Ça li dira un poi de son penser.
A rois sire la raina oit parlé :
« O çentil rois, e voio qe vu saçé
« E vos diro li voir, se oïr lo voré.
« Moier sui de K. l’inperé,
« Le meltre rois qe posa eser trové ;
« Par un malvas hon e son sta condané,
« E de mon reame e son sta caçé,
« Malvasement e cun grande peçé.
« Deo soit ben tota la verité
« Se unche mais eo l’avi pensé.
« Si cun li rois m’avit çuçé,
« Ça estoit li fois preso et alumé,
« Quando un abes m’avoit confesé,
« E quando oldi toti li me peçé ;
« Adoncha fui de la mort deliberé.
« E mon segnor, si cun fo conselé,
« Ad un çivaler el m’avoit doné
« Qe mener me devoie in estrançe contré.
« Quando da Paris eo fu delunçé,
