Page:Anonyme - Macaire, chanson de geste.djvu/348

156

1849—1875

Macaire.

« De soa file nesun mal penser.
« E ben guardés d’ele à çuçer ;
« Mais el vo proie que la deça envoier
« Qe avec le elo ne vol rasner,
« Savoir s’el est voir, o falsa calonçer.
« S’el sera voir q’el se posa proer,
« Si asprament elo la fara çuçer
« Qe toto le mondo s’en aura merveler ;
« Sel no e voir, no la vol calonçer.
« E ben guardés por dito de liçer
« Ne le faisés onta ni engonbrer. »
Li rois l’intent, molto li parse noier.
Elo reguarde dux N. de Baiver.
« N., dist il, grant est li destorber
« Qe m’oit fato le traito losençer
« Qe à torto me calonço ma muler.
« Conselés moi, e vos voio en proier,
« Como me poroie da cele enperer
« De soa file dire e escuser. »
E dist N. : « Vu farés como ber ;
« Vu le farés dire e créenter
« Qe vestre dame l’invoiesi l’autrer
« Par un çivaler cortois e ber ;
« Mais un Macario malvasio e lanier
« Contra vos voloir si le aloit arer,
« Si le oncis al brant forbi d’açer.
« Qe devenise de la raine, quel no le savés conter,