El mesaçer s’en torne tot abusmé.
Quant à Paris el fo reparié,
Li rois trova et N. l’insené ;
La novela li conte qe cil li oit mandé.
Quando li rois l’intende, tuto fo trapensé.
Et dist N. : « Mal avon esploité,
« Qe cil rois oit grant poesté
« De çivaler, de conti e de casé,
« Ben estoit guarni de riçe parenté.
« De soa file mal vos avez porté,
« En strançe part l’avez envoié.
« Ne savon d’ele novele por verité
« S’ela est viva o morta delivré.
« S’el ne fa guera, nu sen desarité :
« N’en lasera castel ni fermité,
« El n’ardera le vile e le cité. »
Dist li rois : « Soia al voloir de Dé ! »
« Emperer sire, ço le dis Naimon,
« Da vestra part est venu la cason
« De la raine, sens mal contençon,
« D’ele non avés fato se mal non.
« Senpre avez créu li parant Gainelon
