« Se d’avoutire n’a vers lui meserré ;
« Por ce la puet à martire livrer.
« Dont à vo roi de par le mien dirés
« Que de sa fille orendroit lait ester,
« Que vive ou morte ne la puet recovrer.
« Et neporquant ja nen ost il penser
« Que il en ait ne or cuit ne deniers.
« S’en France vient por Kallon gueroier,
« Là trovera tant vaillant chevalier
« Qu’en tot le mont n’en a nesuns son per
« Por bien ferir et en estor joster. »
Li messagier furent saige et vaillant ;
De Kallemaine cui tote France apent
Entendu ont son cuer et son talent,
Et de Naimon oï le covenant :
Que de l’avoir ja ne donra noient,
Et de la dame, n’en sait le covenant
Se ele est vive o s’est morte ensement.
Congié demandent, mais ains li vont contant
Si com lor sire le vait or desfiant.
Et dist li rois : « Et je lui ensement,
« Maugré qu’en ait, qu’en soit grains et dolens.
