Adont chevauchent les oz l’emperéor
Costantinoble qui tient et tot l’onor. (*)
Sa fille en mene la bele Blancheflor,
Ensemble od ele son petit enfançon,
Et Varocher, qui nen ert dels peiors,
Qu’asés vaut plus d’un autre poignéor.
Tant sont alé, que n’i firent demor,
Qu’en France vienent ; illec firent sojor.
Quant à Paris sont, fors par cel erbor,
Trefs et aucubes font tendre là entor.
Quant l’a véu Kalles l’emperéor,
Ne puet muer des iex dou front n’en plort.
Naimon apele, son boin conseléor :
« Naimes, fait il, bien puis avoir dolor
« Quant je me voi entrer en tel fréor.
« Mar ai véu ma moillier Blancheflor !
« Ahi ! Macaires, fel cuivers lechéor,
« Mar ai éu envers toi nule amor,
« Que por loier me fustes traïtor,
« Aubri m’ocistes à duel et à fréor,
« Dont ma moillier m’ala à desonor. »
Et dist dus Naimes : « Por quoi faites tel plor ?
« Se vos remembre del tens ancianor,
