« Cil de Maience vos ont mis en iror,
« Traï vos ont de pieça li plusor.
« Dex les confonde, l’altismes criator ! »(*)
Naimes parole, mais n’a talent qu’il rie :
« Drois emperere, ne lairai ne vos die
« Cil de Maience et de la segnorie
« Nos ont or mis en si mauvaise vie
« Que je ne sai por voir que vos en die.
« Nos a Macaires fait itel vilenie
« De Blancheflor, ne sai que vos en die.
« Or vient sor nos une chevalerie
« Qui nos déust privée estre et amie
« Et si sera nos mortés enemie.
« A nos en croist et bataille et haschie
« Que mais en France ne vint tés estoutie.
« Or nos aït Dex et sainte Marie,
« Que je ne sai uimais que vos en die !
« Quant me remembre de ma ancesserie
« Qui tote fu par traïtors fenie,
« Dolor en ai et mautalent et ire. (*)
« De cele chose ne me demandés mie ;
« N’en sai que dire, se Dex me benéie. »
