Kalles li rois ne se vout atargier ;
Sa gent a fait garnir et conréer :
Bien trente mile sont à corans destriers.
Li boins Danois et Naimes de Baivier
Et Isorés sont si gonfanonier.
La porte font ovrir et desbarrer,
Là fors en issent, cui qu’en doie anoier.
Quant ot li rois la novele conter
Costantinoble qui tient et le regnier,
Maintenant fait monter ses chevaliers,
Et furent bien quarante mile armé.
Volés oïr com le fist Varochers ?
Ne le fist mie à loi de pautonier.
Nen ot cheval, palefroi ne destrier ;
Arriere vait avec les paoniers,
Son grant baston ne vout mie oblier.
Quant a véu l’ost Kallon au vis fier,
Il se porpense de sa gentil moillier,
De ses enfans que il laissa derier,
Quant la roïne se prist à convoier
Que trovée ot ens el grant bois ramé.
Qui le véist son baston paumoier,
