Page:Anonyme - Macaire, chanson de geste.djvu/407

La bibliothèque libre.
Le texte de cette page a été corrigé et est conforme au fac-similé.
2520—2542
215
Macaire.

Le branc d’acier li ceint au lez selonc,
Et li dus Pons li chauce l’esperon.
Et Varochers jure saint Siméon
Qu’en lui rois Kalles aura mau compaignon. (*)

Coment Varochers fu fais chevaliers.

Quant ensi fu adobés Varochers
Qui soloit vivre en bois et en rivier,
Quant au costé ot ceint le branc d’acier,
A grant merveille fesoit il à proisier.
Et la roïne, qui tant ot le vis cler,
Si li dona un bon hauberc doblier
Et un bon elme, au cercle cler doré.
Quant Varochers se vist si atorner, (*)
Il est montés sor un corant destrier,
Prist une lance dont li fers est d’acier
Et une targe d’un olifant moult cler.
Qui le vèist corir et trestorner
Ne perroit mie uns truans pautoniers,
Ains ot semblant de gentil chevalier.
Dist l’uns à l’autre : « Véés de Varocher
« Come bien set trestorner cel destrier !
« A grant merveille resanle bon guerrier. »
Tel mil d’entre eus, qui vuelent gaaingnier
En sa compaigne vont à lui s’ajoster