« Que soit chascuns de vos preus et vaillans.
« Se vos mostrés hardis et conoissans,
« Tant averons et or cuit et argent
« Qu’en seront riche tuit li vostre parent.
« Deriere moi venrés, n’irés avant,
« Et vos menrai au tref à l’amirant,
« A Kallemaine, le riche roi poissant.
« Là troverons les bons destriers corans,
« Les palefrois et les mulés amblans ;
« S’avoir i a, nesuns ne le demant. »
Et cil li dient : « Tot soit à vo talent. »
Et Varochers ne demora noient ;
Il est montés desor son auferant,
Ensemble o lui sa gent tot ensement,
Et si chevauchent en recoi, belement, (*)
Defors de l’ost sans noise et sans bobant.
Il nen apelent ne amis ne parens,
Et si chevauchent de la part d’Orient
Par un chemin par delez un pendant,(*)
Près de Paris le trait à un arpent. (*)
En l’ost s’en entrent l’emperéor des Frans ;
Trosqu’à sa tente ne vont resne tirant,
Et vont criant hautement en oiant
Com fait la guette qui les chans vait cerchant.
François les oent, ne lor dient noient,
Cuident que soient de lor gent voirement.
Et par ensi cil se traient avant,
Page:Anonyme - Macaire, chanson de geste.djvu/411
Le texte de cette page a été corrigé et est conforme au fac-similé.
2565—2591
219
Macaire.
