Page:Anonyme - Macaire, chanson de geste.djvu/458

266

3158—3183

Macaire.

« Un enfant partori ; quant le fi bateçer,
« Li rois d’Ongarie le vene ad alever,
« Son nome le mist ; si se fa apeler.
« Quant conoue la dame, molto l’avoit çer,
« Grant honor le fi, si mando à son per.
« E son pere mando por lei de nobeli çivaler ;
« En Costantinople el se la fe mener.
« E por le a fato questa oste asenbler.
« E si te poso par droito non conter
« Qe quella dame cun tot li baçaler
« Si est en l’oste de l’inperer son per,
« E qi la volt, là la pora trover
« E sana e salva, sença nul engonbrer. »
Quant li Danois li oldi si parler
E tel rason dire e deviser,
Qi le donast li honor de Baiver,
Nen seria si çoiant par nula ren de mer.
El se decline enverso Varocher,
Entro le fro mis le brando d’açer.
« Varocher, dist il, e vos o molto çer ;
« Non plasa Deo, li vor justisier,
« Qe contra vos e voia plu çostrer.
« Çer vos tiro cun vos fustes mon frer
« Nen avero ren, ni avoir ni diner,
« Avec vos ne sero parçoner. »
E Varocher l’en pris à mercier.