Dist la roïne : « Entendés mon talent ;
« Ce que dirai sachiés à escient.
« En mon pere est trestos l’acordemens,
« Et cil puet faire de moi le suen talent.
« Norrie m’a, et moi et mon enfant,
« Puis que de France ai fait desevrement ;
« Se il l’otrie, moult en serai joians. »
Dist li dus Naimes : « Vos parlés saigement. »
L’emperéor vait parfont enclinant.
« Sire emperere, dist Naimes li vaillans,
« Par cel Dieu qui nasqui en Belléant,
« Avec Kallon faites acordement.
« Sa dame rait, que drois est voirement
« Que ne les puet partir nus hom vivans. »
Dist l’emperere : « Vos parlés sagement ;
« Mais d’une rien sachiés à escient
« Par un petit que je ne m’en repent,
« Quant me porpense de la mesprison grant
« Que à ma fille fist il mauvaisement ;
« Et bien savés se je di voir o ment.
« Mais neporquant je vos en doins le gant,
« Que ceste oevre faciés vostre commant. »
