Quant l’emperere cui tote France apent
Vist le mesage, moult par en est joians.
Adonc apele les meillors de sa gent,
Si se vesti d’un paile d’Orient,
Et s’est montés el palefroi amblant.
Au roi à qui Costantinoble apent
S’en est venus tost et isnellement.
Li rois le voit, n’i fist arrestement,
Contre li vait, et des siens plus de cent.
L’uns envers l’autre se mostrent bel semblant,
De la pais faire entr’eus tienent content. (*)
Es la roïne qui part le parlement.
Kalles la voit, s’en a ri belement.
Ele li dist : « Gentis rois sorpoissans,
« Ne me sovient d’ire et de mautalent.
« Fui encorpée à vos à tort, vieument ;
« Li fel Macaires, li cuivers soduians,
« Onir vos vout à tort et fausement,
« Aubri ocist à l’espée trenchant :
« Vengeance en pristes, véant tote la gent. (*)
« Vos moilliers sui, autre segnor n’atent ;
