« Grans pechiés faiz se nos lais essilier ;
« Legierement nos puet on essillier. »[1]
Marcens ot non la mere Berneçon,
Et tint .j. livre dès le tans Salemon ;[2]
De Damerdieu disoit une orison.
R. saisi par l’auberc fermillon :
« Sire, » dist ele, « por Dieu et por son non,
« Ou est B., gentix fix a baron ?
« Je ne le vi dès qel norri garçon.
— En non Dieu, dame, au maistre pavillon,
« Ou il se joe a maint bon compaignon ;
« Tel chevalier n’a ju[s]q’al pré Noiron.
« As fix H. m’a fait movoir tençon,
« Et ci dist bien ja ne chaut esperon,
« Se je lor lais le montant d’un bouton.
— Diex ! » dist la dame, « com a cuer de felon !
« Il sont si oncle, si qe bien le seit on ;
« Se le lor perdent, mar les i verra on !
« Sire R., valroit i rien proiere[3]
« Qe .j. petit vos traisisiés ariere ?
Nos somes nonnes, par les s. de Baviere ;
« Ja ne tenrons ne lance, ne baniere,
« Ne ja par vos n’en iert .j. mis en biere.
— Voir ! dist R. vos estes losengiere.[4]
« Je ne sai rien de putain chanberiere[5]
« Qi ait esté corsaus ne maaillere, [6]
