Il an apelle Sarrasins et paiens :[1]
« Singnor, » fait il, « savés moi concillier ?
« En celle engarde vois ester .j. paien :
« Si nous a mort .iij. de nos chevalliers ;
« N’i a .j. seul qui en soit repairiés.
— Par Mahomet ! » ce dist li chartrerie[r]s,
« En ta prison avons .j. crestiien,
« Devant Saint Gile li vis molt bien aidier :
« A .xxx. Turs li vis coper les chiés.[2]
« C’il ne t’aïde, je ne sai qu’il an iert. »[3]
Et dist li rois : « Car le m’amenissiés. »
Et cil respont : « Biax sire, volentier. »
Fors de la chartre ot amenet B. ;
Li rois le voit, cel prent a araisnier :
« Crestiiens, frere, molt iers grans et plaingniers,
« Molt iers fornis, bien sanbles chevalliers,
« Et je si ai d’aïde grant mestier.
« An celle engarde vois ester .j. paien :
« Il nous a mors .iij. de nos chevalliers ;
« Il les a tous ocis et detrainchiés.
« Mais je vous dis, ce vos i conbatiés[4]
« Par hardement, et vous si l’ociiés,
« En vo païs tous cuites en iriés,
« A tous jors mais mes amis en seriés.
« Si te donrai tos chergiées .xx. sosmiers
« De dras de soie, de fin or, de deniers. »[5]
B. l’entent, onques ne fu si liés,
Il li respont : « Je irai volentier,
« Car miex vuel estre ocis et detrainchiés,
« Qu’an vostre chartre jamais me jetissiés.
« Mais tot avant me donés a maingier. »
Li rois respont : « Bien fait a ostroier. »
Tout maintenant l’en fit assés baillier,
Page:Anonyme - Raoul de Cambrai.djvu/346
Cette page a été validée par deux contributeurs.
235
raoul de cambrai
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page346-1024px-Anonyme_-_Raoul_de_Cambrai.djvu.jpg)