Et H. se porquiert et esforce
Comme celui qui cuide faire noce ;
Dist au paumier : « Jhesus t’aist en sa gloire !
« Porterons nous avuec nous nulle chose,
« Ne pain, ne vin, ne nulle crostre grosse ? »
Et dist B. : « Par saint Pierre l’apostre,
« Puis que li hons a la dame repose,
« Molt volentiers mainjue bone chose. »
Dist B. : « Sire, faites venir la dame,
« Si parlerons et moi et li ensanble. »
Et H. apella Julianne :
« Va tost, » dist il, « si apelle ta dame.
— Sire, » fait elle, « par tos les sains d’Otrante,
« Il n’an a point el lit ne an la chanbre ;
« Mais ces mentiax et ces robes i pendent. »[1]
H. l’oit, par poi qu’il ne forsanne ;
Vint a la chanbre, l’us brisa, puis i antre,
Et quiert sa feme el lit et an la chanbre.
Quant ne la trueve, par poi qu’il ne forsanne.
Herchanbaus quiert sa feme o le cors gent.
Quant ne la trueve, molt ot le cuer dolent.
Il an apelle chevalliers et serjans :[2]
« Singnor, » fait il, « entendés mon sanblant.
« Dès hui matin vint cis pasmiers saiens ;
« Tant a parlet et arier et avant,
« Fuïe en est ma mollier au cors gent.
« Mais, par celui a cui li mons apent,
