Dusques a Blaives sejornent molt petit ;
La nuit sejornent desci dusqu’au matin,[1]
Puis si en vinrent droit a Bordiax la cit ;
Parmi la Lande aqueullent lor chemin.
De lors jornées ne sai conte tenir ;
Tant chevauchierent et par nuis et par dis,[2]
Par le bel tans et par le lait ausit,[3]
Que a Saint Jaque vinrent a .j. mardi.
Au mostier vont quant ostel orent pris :
Le soir vellerent, chascuns .j. sierge espris.[4]
Au matinet vont le servise oïr ;[5]
Del mostier issent quant li servise est dit.
A lor ostel mainjuent .j. petit,
Et puis monterent sor les chevax de pris
Et se penerent molt forment del venir.[6]
En .xxx. jors revinrent a Paris ;
N’i truevent pas le fort roi Loeys :
A Loon est avueques ses amis,
Icelle nuit jurent a Saint Denis,
L’autre a Conpiengne, .j. chastel signori,
Et l’andemain a Loon, ce m’est vis.
Le roi troverent qui grant joie lor fit.
D’anqui s’an tornent tot droit vers Sain Quentin.
Si com il vinrent es prés sos Origni,
En celle place ou Raous fu ocis,
Li cuens B, fist .j. pesant sospir.
Li sor Gr. molt bien garde s’en prist ;
Il li demande por quoi sospira il ?
« Ne vous chaut, sire, » B. li respondi,
« Que maintenant me tient il au cuer si.
— Jel vuel savoir, » ce dist li sor Gr.[7]
Page:Anonyme - Raoul de Cambrai.djvu/394
Cette page a été validée par deux contributeurs.
283
raoul de cambrai
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page394-1024px-Anonyme_-_Raoul_de_Cambrai.djvu.jpg)