Dont son lignage fu duremant iré,
Si li en sot R. merveillox gré ;
Mais, puis après, fut moult chier comparé,
Si com il iert ci avant aconté.
Li quens Doon, et Hued. le marchis,
Et le lignage qui mout iert posteïs,
Orent Cambrai de totes pars asis.
S’an peüst estre a celz dedans le pis,
Quant au secors li vint li rois Pepins,[1]
Et li quens Dreu, Ysangrinz li gentis,
Et ses .ij. filz et lor autres amis.
Quant les choisit et vit Doonz li Gris,
De voir sachiez mout fut mautalantis.
Contre le roi s’en vont toz ademis,
Les lances roides et les escuz saissis.
Si en eüssent les gens le roi le pis,
Ne fust R. et Berniers li gentis
Qui de ferir furent volonteïs.
Maint cop i ont et receü et pris,
Et maint escu estroé et maumis ;
Et Ysengrins s’en est mout antremis
Et si dui fil qui erent de grant pris ;
Cil furent bien au roi Pepin aidis.
Devant Cambrai fut le tornoiement
Fort commancié et feru aspremant,
Mès mout estoient cil de Flandres grant gent.
Ne les poïst li rois soffrir granmant,
Quant Girbers vint et si fil fieremant,
Et Mauvoisin et H[ernaus] ausimant,[2]
Sanson le duc et si autre parant,
Et le barnage ou grant proesce a tant.
D’autre part vint Gerins hastivement,
Et celz dou Liege et si autre parant.
En la bataille, par grant esforcemant,
Se sont feru mout aïréemant.
Page:Anonyme - Raoul de Cambrai.djvu/414
Cette page a été validée par deux contributeurs.
303
d’après girbert de metz
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page414-1024px-Anonyme_-_Raoul_de_Cambrai.djvu.jpg)