Et le lignage qui moult fist a proisier
Après souper se sont alé couchier
Et se dormirent de ci a l’esclairier.
As armes courent sergent et chevalier,
Et si s’en issent l’estor recommancier ;
La veïssiez et ferir et lancier,
Maint fort escu estroer et percier,
Et maint hauberc desronpre et desmaillier,
Maint vaillant home morir et trebuchier,
Les uns foïr et les autres chacier,
Et les fuians guanchir et repairier,
En trestornant ferir del branc d’acier ;
Maint vaillant home parmi le cors plaier,
Et des chevax trebuchier en l’erbier.
Telz i versa qui ne pot redrecier.
La gent Doon, Flanmanc et Hannuier,
Ne porent plus soffrir l’estor plenier ;
En ganchissant s’en retornent arrier.
Et Loheranc conmancent a chacier,
Qui mout se font mautraire et anpirier.
De ci a tant que il dut anuitier
Dura l’enchaus qui mout fut grant et fier.
A Lenz repaire Hued. et si guerrier,
Et Doz li Gris ou n’ot que correcier,
Et lor lignage qu’il ne voldrent laissier.
Le soir i ot duel et grant et plenier,
[Et] mainte temple i veïst l’en sachier.
Et l’amperere s’en retorna arrier
Dedans Cambrai ou se fist aaissier.
Qui la vout prandre mout i pot gaaignier.
Trez et acubes font li Roial chargier :
Telz povres iert, mentir ne vos en quier,[1]
Qui onques puis n’ot d’aïde mestier.
Icele nuit se font bien aaisier
Jusqu’au demain que il dut esclairier.
R. monta, o lui .c. chevalier ;
Vers Oreignei a pris a chevauchier,
- ↑ 280 Ms. Telz iert povres.
