Se il ancontrent qui bataille lor haut,
Je ne cuit mies que sans ferir s’en aut.
En la huitiesme eschiele par desa
Fu li frans rois Gerins qui les guia
Et ses .ij. filz que duremant ama.
.IIII.c. homes li rois o lui mena ;
Toz li plus povres palefroit corant a.
Vers Lenz chevauchent, chascuns s’en aprocha
Serréement, nuns ne se desrea.
En la nuefvisme eschiele fut Girbert,
Li nobles rois qui tant estoit apert,
Et ses .ij. filz dont chascuns l’ainme et sert.
.CCCC. homes, chacuns destrier covert,
Le vont sivant a helme rouge ou vert.
S’a l’estor vienent, foi que doi saint Lambert,[1]
Maint gentil vantre sera par elz overt.
La diesme eschiele conduist li rois de France,
O .ij.m. homes, toz de sa connoissance ;
Vers Lenz s’en vont plain d’ire et de pesance.
Se les Flamans ancontrent, sans doutance,
A lor pooir en panront la venjance.
Li rois de France ot sa gent establie
Et devisée sa riche baronnie.
Vers Lenz chevauchent, tot plain de felonnie,
Et Thionet les conduist et les guie,
Lui et Hermant ou durement se fie,
Que par elz n’aient annui ne vilonnie.
N’esparnient pas celz de l’autre partie,
Que d’elz doit estre a toz jors mes haïe,
Quar fait lor ont outrage et vilenie :
Sel vangeront se Dex lor donne vie.
Or a li rois de France devisée
- ↑ 498 saint, ms. ss.
