Venu au chaple et avant et arrier.
La poïst on veoir estor plenier,
Et piez et poins a la terre anvoier.
Herbert i fiert a loi de chevalier,
Ymbert son fil n’en vout nul esparnier,
Et Berneysonz s’i sot mout bien aidier.[1]
Voit le Raoulz, n’i ot que correcier.
Cortoisement le prist a araisnier :
« Berneysonz frere, por Deu le droiturier,
« Se vos volez anvers moi rapaier,
« Ceste bataille ferai bien traire arrier. »
Dist Berneysonz : « Nel voil pas otroier :
« Ma mere arsistes an Oreignei mostier
« Et moi feïstes la teste pesoier ;
« D’or en avant pansez de vos gaitier. »
A icest mot eslaisse le destrier ;
Envers Raoul conmansa a brochier,
Grans cox se sont donné li chevalier,
Que les escuz font maumetre et percier.
Ja s’enpirassent, ce croi, au mien cuidier,
Quant de .ij. pars sont venu sans targier
Lor bon ami qui lor viennent aidier ;
Tot pelle melle vont l’estor enforcier.
Grant sont li oz quant furent asanblé.
Parmi l’estor es vos Gerart monté : [2]
Huedon de Hans a devant lui trové,
Parmi le hiaume li a tel cop donné
Que parmi outre l’a fandu et copé.
Mort l’abati, s’a Gerart ancontré,
Cel de Poitiers ou tant ot de fierté :
Par terre l’a maintenant cravanté.
Doonz le Gris a tot ce regardé :
De Flandres a conte Huedon apelé,
Le duel li a et son annui mostré.
Quant l’ot li quens, s’a le destrier hurté,
Envers Gerart a son escu torné.
Page:Anonyme - Raoul de Cambrai.djvu/426
Cette page a été validée par deux contributeurs.
315
d’après girbert de metz
![](http://upload.wikimedia.org/wikipedia/commons/thumb/3/3a/Anonyme_-_Raoul_de_Cambrai.djvu/page426-1024px-Anonyme_-_Raoul_de_Cambrai.djvu.jpg)