Par pou ne chiet jus de son arragon,
Puis point le bai, baise le confanon,
Fiert Amauri par grant aïroison,
Cel qui de Roie tint le maistre donjon ;
Mort l’abati del destrier el sablon.
Flamanc le voient, irié sont del baron.
Quant Berneisonz vit son oncle morir,
Del cuer del vantre a geté .j. sospir,
Le destrier broche par merveillox aïr
Vers Guinemant, qu’il le cuida ferir ;
Mès de cest cop le fist Ymberz ganchir
Que sor son col vit l’espée tenir.
Cele part fait le bon destrier salir,
Que paor ait n’i puisse a tans venir.
Berneysons vit son pere anmi lo pré,
Que rois Girbers a malemant mené.
Cele part vient le branc nu entesé
Et fiert Girbert .j. cop desmesuré
Parmi lo chief, que tot l’ait estoné.
Li cox descent desor l’escu bouclé,
An .ij. moitiez l’a fendu et copé,
Au bon cheval ait lo chief tronsonné,
Girbert abat anvers anmi lo pré.
Quant Mauvoisins ait le cop esgardé,
Cele part point lo destrier abrivé ;
Prant une lance que gesir vit el pré,
Et fiert Bernier sor son escu listé ;
Desor la boucle li a frait et froé.
Fort fu l’auberc, n’en ait maille fausé,
Mais del grant cop l’ait a terre versé
Joste Girbert et Ymbert lo manbré.
Quant Doz li Gris a tot sou esgardé,
Mout l’en pesa, sachiés de vérité ;
Por lo secourre ait lo cheval hurté.
Mais Mauvoisins li a tel cop donné
Parmi lo hiaume, que tot l’ait estonné ;
Tot estordi l’abat anmi lo pré,
Page:Anonyme - Raoul de Cambrai.djvu/429
Apparence
Cette page a été validée par deux contributeurs.
318
raoul de cambrai